అష్టకాల విద్యాచరణ్ 4వ అష్టావధాన పూరణలు

 23-8-26...ఆదివారం. ధర్మిష్ఠ గృహ సముదాయం మియాపూర్ లో

శ్రీ అష్టకాల విద్యాచరణ్ గారి అష్టావధానం ..

సభాధ్యక్షులు& విశిష్ట అతిథి: దేవీ ఉపాసకులు బ్ర.శ్రీ చెప్పెల హరనాథ శర్మ గారు, మర్పడగ క్షేత్రం.

సభాసమన్వయం: శతావధాని శ్రీ అయితగోని వెంకటేశ్వర్లు గారు...

1.నిషిద్ధాక్షరి...తెలుగు భాష వైశిష్ట్యం (ప్రాశ్నికులు: అవధాని డా.శాస్త్రుల రఘుపతి గారు)

కం.

స(ర)త్య (భ)మ్మై  శ(త)బ్దంబుల్

నిత్యం (క)బౌ (వ) భా(వ)షగా (న)దె నేస్తంబౌచున్

ముత్యమ్ములవలె వెలుగుచు

కృత్యంబై యిలను తెలుగు గీర్వాణియనన్...!

సత్యమ్మై శబ్దంబుల్

నిత్యంబౌ భాష గాదె నేస్తంబౌచున్

ముత్యమ్ములవలె వెల్గుచు

కృత్యంబై యిలను తెలుగు గీర్వాణియనన్

2.సమస్య..(ప్రాశ్నికులు: అవధానిని డా.వేదాల గాయత్రి గారు)

*చినవాడే మము బ్రోచుగాత సతమున్ క్షేమంబులన్ గూర్చుచున్.!*

పూరణ:

మనమందున్ కడుభక్తి భావగరిమన్ మంత్రమ్ముగా నిల్పుచున్

ఘనమైనట్టి విశిష్ట యజ్ఞముల విజ్ఞానమ్ములన్ బంచుచున్

క్షణమైనన్ తననిష్ట వీడకమదిన్

కష్టమ్ములన్ చూడ వ

చ్చినవాడే మము బ్రోచుగాత సతమున్ క్షేమంబులన్ గూర్చుచున్.!

3..దత్తపది...భక్తి ,శక్తి ,ముక్తి, యుక్తి.. భక్తి సాధనము పండరి వారి సాహిత్య కృషి. (ప్రాశ్నికులు: అవధాని శ్రీ ముత్యంపేట గౌరీశంకర శర్మ గారు)

మ.కో

శక్తి లేదనిచింత లేదుట శస్తమౌ పద సంపదల్

యుక్తితోసమకూర్చ జూచెడు యోగి పండరి కృష్ణుడే

ముక్తిమార్గములన్ని జూపగ ముక్తినాథుని కొల్చుచున్

భక్తి సాధన సల్పుచుండెడు పద్యసేద్యము నిత్యమున్...!

4..వర్ణన...అవధాని గారిని గూర్చి తండ్రి గారి ఆంతరంగం..(ప్రాశ్నికులు: అవధాని శ్రీ బండకాడి అంజయ్య గౌడ్ గారు)

ఉ.

ఎప్పుడు వచ్చెనో చదువు నెప్పుడు వ్యాకరణమ్ము నేర్చెనో 

చప్పున పద్యమున్ చదువజాలడు పండితులేల మెత్తురో!

ముప్పును దెచ్చునో జనుల మోదమునందునొ నీ పరీక్షనున్

గొప్పగ దాటిపోవనటుల కూరిమి పంచుమ వాగధీశ్వరీ..!

5.చిత్రకవిత...శ్రీలలితాంబ ( ప్రాశ్నికులు: అవధాని శ్రీ బైరపనేని పోతురాజు గారు)

మ.

ఇలనేగాంచెడు రెండు పాదమ్మలనే నిష్టమ్ముగా గాంచితిన్

కలలన్ దీర్చెడి ప్రేమచక్షువులలో  కారుణ్యమున్ గాంచితిన్

జలజాతాస్యము పూర్ణచంద్ర సమమున్ శస్తమ్ముగా గాంచితిన్

లలితాంబన్ మనసార గాంచితిని సల్లాపంబులన్ సల్పుచున్..!

6.ఆశువులు. (ప్రాశ్నికులు: కవి పండితులు, శ్రీ పి. ఎల్.నాగేశ్వర రావు గారు)

1.ఉత్తర గోగ్రహణమునకు సంబంధించి ఏదైన 

ఉత్తర గోగ్రహణంబున

సత్తువ చూపించి నీల్గి శస్త్రాలుగనన్

చిత్తంబున భయము నిలువ

తత్తరపడి ఉత్తరుండు ధరపై వణకెన్..!

2.ఇంట్లో వారికి ఇబ్బంది లేకుండా పద్య సాధనకు మార్గం

 

ఉద్యోగంబుకు సరిపడు

విద్యను నేర్పించవలయు విధిగా సతికిన్

సద్యఃస్ఫూర్తిన పద్యము

ఉద్యమముగ వ్రాయవచ్చు నుత్సాహముతో...!

పద్య అంత్యాక్షరి ప్రాశ్నికులు: కవి పండితులు శ్రీ నమిలికొండ విజయ భాస్కర్ గారు

అప్రస్తుత ప్రాశ్నికులు: కవయిత్రి శ్రీమతి శనిగల మానసగారు

Web video 01: https://youtu.be/IdEkaBuw7Do?si=seBC3t0SdhfPE167 

Web video 02: https://youtu.be/wse4OUZXDmk?si=wlKOhvX1rpDVyME8 

Web video 03: https://youtu.be/P6U8ioKLFZc?si=AA9NrUim1nLzQ3Km 

Web video 04: https://youtu.be/0OEoL63ay5Y?si=YMdR-hHIUfULeUEl 

Web video 05: https://youtu.be/a4SZ8-daGsU?si=Aff7i_eB9M5DxiJP 

Web video 06: https://youtube.com/shorts/NolgntvnWRM?si=6ff--OrSiQ0Px51G